Y12 NISSAN WINGROAD ОЛОН ТАЛЫН АШИГТАЙ.
Олон талын ашигтай бага оврын вагон
(Type Y10) Wingroad загварын эхэн үе 1996 онд гарсан бөгөөд Sunny California болон AD загваруудыг нэгтгэн хөгжүүлснээр түүх эхэлжээ. 2-р үе нь 1999 онд гарч 2005 он хүртэл үйлдвэрлэгдсэн бөгөөд тус оноос 3-р үе нь зах зээлд гарч эхэлсэн байна. Олон нийтийн дунд эдийн засгийн хэмнэлттэй байдал, салоны зай, өндөр зэрэг нь маш ихээр таалагдсан бөгөөд залуу худалдан авагч нарын сонголт болж чадсан байна.
Анхны төлөвлөгөөт худалдан авалт 3,500 ширхэг/сард байсан бол энэ тоо 7,650 ширхэгт хүрч байсан удаатай байдаг юм байна.
Үнэ болон хувилбар
1.8 литрийн "MR18DE" хөдөлгүүр, 1.5 литрийн "HR15DE" (4AT хурдны хайрцаг болон CVT сонголттой) мөн 6 шатлалт CVT-M6 хурдны хайрцгийн сонголттой байсан. Улмаар Марч, Тийда загваруудтай ижилхэн цахилгаан 4WD буюу e-4WD системийг сонгон авах боломжтой болжээ.
1.5 литрийн хөдөлгүүртэй хувилбар нь 1.892.100-1.490.100 иений ханштай харин CVT хурдны хайрцагтай "15RX" нь 1.600.000 иен харин "15RX Aero" хувилбар нь 1.690.000 иений ханштайгаар борлогдож байсан байна.
Дээрхээс гадна нь 1.8 литрийн (CVT M6 хурдны хайрцагтай), 1.5 литрийн e-4WD системтэй (4АТ), 1.5 литрийн CVT хурдны хайрцагтай хувилбарууд 2.201.850-1.991.850 иений ханшаар дотоодын зах зээлдээ борлогдож байсан байна.
Багц болон загвар
Бидний тест хийж буй уг загвар нь 16 инчийн обуд болон намсгасан пүрш амортизатортай.
Нийт урт нь 4400 мм, өндөр нь ойролцоогоор 1500 мм, өргөн нь 1695 мм байлаа. Хэмжээний хувьд Хонда Airwave болон Королла Fielder загваруудтай ойролцоо, тиймээс ч тэдгээртэй өрсөлддөг Ниссан компанийн цор ганц загвар юм.
Өвөрмөц хэв маяг
Хажуу талаас харахад шилний нумарсан хэлбэр нь өндөр сэтгэгдэл төрөхүйц. Ер нь ч Ниссан этгээд өвөрмөц загварлаг тал дээр бусад Япон авто үйлдвэрлэгчдээс онцгойрдог компани гэдгийг хүн болгон мэдэх байх. B багана буюу дунд багана нь хар өнгийн тул үзэмжид сайн зохицсон байна.
Салонын давуу тал
Салоны хэв шинжид хурц өнцөг байхгүй. Хөлөөс урд самбарын дээд цэг хүртэл маш сайн зохицож өгсөн бөгөөд жолооны ард суухад руль асуудал үүсгээд байхааргүй эвтэйхэн. Маш хурдан тав тухаа олдог. Суудлын бүрээс болон элдэв чимэглэлүүд ангилалдаа таарсан чанартай. Нэмэлт HDD навигэйшн, мөн iPod холболт зэрэг зүйлстэй багц бий.
Бидний тест хийж буй загвар 1.5 литрийн хөдөлгүүртэй бөгөөд шатахуунд хэмнэлттэй байгаа нь мэдрэгдэж байв. Хойд суудлуудыг хурааж болдог онцлогтой. Урд суудлыг хойш нь 120 мм хойшлуулж болохоос гадна 40 градус хүртэл хэвтүүлж болдог. Хол замд явахад тохойн тавиур, аяганы суурь зэрэг зүйлс байхгүй нь бага зэрэг дутагдалтай тал нь юм.
Хэрвээ та арын суудлыг хэвтүүлбэл багажинд 412 литрийн зай гарна. Ингэснээр дугуй ачаа зэргийг хялбархан тээвэрлэж болох юм. Хойд суудлууд нам доор орших бөгөөд толгойн түшлэг нь жижигхэн. Суухад эвтэйхэн ч гэсэн машинаас бууж суухад бага зэрэг төвөгтэй. Толгой цохих боломжтой.
Хөдөлгүүр
HR15DE хөдөлгүүр дээрээс нь Ниссан компанийн CVT хурдны хайрцаг, 16 инчийн обуд, спорт пүрш амортизатор нь өрсөлдөгч нараас 10-15% илүү хэмнэлтийг танд санал болгоно. Шатахуун зарцуулалт нь хянах самбар дээр 18.0км/Л гэж гарч байсан. Хүчний хувьд 1.8-тайгаас арай сул гэхдээ тав тух, нөхцөл үнэхээр сайн.
Спорт жолоодлого
Өгсүүр газар эсвэл машин гүйцэж түрүүлэх үед хаазыг тултал нь гишгэхэд хүч дутагдахгүй байгаа нь анзаарагдсан. Гэхдээ салонд орж ирэх дуу ихтэй.
Хөдөлгүүрийн эргэлт 2,000 эрг/мин ба 100 км/ц хурдтай жолоодлого
Бага зэрэг намхан болсон нь түүнийг хатуу болгожээ. Заримдаа огцом зогсох шаардлага гарах бөгөөд пүршний ажиллагаа чанга байгаа нь мэдрэгдэж байв. Энгийн амортизатор долгионлог ажиллагаатай байдаг бол түүнд энэ байдал байхгүй. Гэхдээ энгийн хувилбарт энэ бүгд хэвийн гэдгийг санах хэрэгтэй.
Хөдөлгүүрийн эргэлт 2,000 эрг/минутанд 100 км/ц хурдтай явах бөгөөд шатахуун бага зарцуулах хамгийн боломжит нөхцөл юм. Хэрвээ та хурдаа 150 км/ц болгохыг хүсвэл хаазыг бага зэрэг гишгэхэд л хангалттай. Гэхдээ хөдөлгүүрийн дуу зорчигчдод таагүй санагдах вий.
Давуу тал
Дизайны хувьд ер бусын шийдэлтэй. Ирээдүйгээ харж залуу худалдан авагч нарт зориулсан нь илт мэдрэгдэж байв. Түүний энэ загвар Марч, Куб, Тийда болон note загваруудад шингээгүй онцлог болсон. Хэмжээний хувьд тийм ч өндөр биш бас тийм ч жижигхэн биш. Яг л таарамжтай хэмжээтэй. Зогсоолд байршуулахад тийм ч төвөгтэй биш дээрээс нь салоны зай тун боломжийн хэмжээтэй.
Би түүнийг хүчтэй, тав тухтай гэж хэлэхгүй, 1.5 литрийн хөдөлгүүрийн гол зорилго бол хэмнэлт шүү дээ. Үнийн хувьд ч боломжийн үнэтэй бөгөөд шинэ машин худалдан авах гэж буй жолооч нарт яг тохирно. Би итгэлтэй байна.
Тээшинд ачаа ачихад хялбар, орчны үзэгдэц сайтай, бага зэрэг спортлог дизайнтай, тээш болон тээшний хаалтыг угаах боломжтой.
90-ээд оны Японы авто үйлдвэрлэгч нар бүхий л зах зээлд гарч байгаа вагон загвартаа 4 дугуйн хөтлөгч системийг ашиглаж байсан. Ойролцоогоор 95 хувь нь энэ зарчмаар явсан бөгөөд 20-р зууны төгсгөл ирэхэд энэ байдал ор тас алга болж эхэлсэн юм. Гэхдээ яг ч ор тас биш 9 жилийн дараагаас түүний хэрэглээ эргэн ирж эхэлсэн.
Хэдийгээр вагон загварын хэрэглээ седан төрлөөс бага хэдий ч Японы хувьд чухал байр суурьтай хэвээр байгаа юм. Японы авто үйлдвэрлэгчдийн бүтээл дотоодын зах зээлд Мерседес-Бенз E-Class вагон загвартай шууд өрсөлдөж чадахгүй ч гэсэн хэрэглэгчдийн ая тух, замын ямар ч нөхцөлд туулах чадвараараа седан төрлөөс ч илүү гэдгээ хэдийнээ харуулаад байгаа билээ.
Вагон загварыг худалдан авахад тийм ч үнэтэй биш, олон талын ашигтай, нөөц бололцоо их зэргийг нь бодолцон үзвэл амьдралд хэрэг болохоор л загвар юм. Харамсалтай нь манай нөхцөлд энэ бүгдийг дутагдал гэж олж хардаг бөгөөд бүх нийтээрээ ад үзэх шинж хандлагатай.
Хямдхан, хэрэглэхэд ашигтай гэдэг үзүүлэлт бол энэ зах зээлийн гол давуу тал. Вингроад загвар ч гэсэн үүнээс хол зөрсөнгүй. Хүчтэй дизайн, хялбар хэрэглээ, бат бөх байдал зэрэг түүнд бүгд шингэсэн.
1.5 литрийн HR15DE 1498 сс DOHC хөдөлгүүрээс 109 морины хүч хөдөлгүүрийн 6,000 эргэлтэд, 4400 эргэлтэд 148 Нм гардаг бөгөөд банкны багтаамж 45 литр.
