SUBARU TRIBECA

Фужи Хүнд Үйлдвэрлэл (Fuji Heave Industrial)-ийн дээд ангиллын кроссовер Subaru Tribeca нь 2005 онд Детройтын авто үзэсгэлэнд анх тавигджээ.

Харин европын зах зээлд 2006 оноос эхлэн борлуулагдаж эхэлсэн байна. Гэрээт дизайнер Алексoм Запатиносомын гаргасан Tribeca-н урд талын дизайн Хойд Америкчуудад төдийлөн таалагдсангүй учир 2006 онд ердөө 18614 ширхэг л борлуулагджээ.

Ингээд 2007 онд урд талын гэрэл нүүр нь шинэчлэгдэн өөрчлөлт хийгдсэн Tribeca Нью-Йоркийн авто үзэсгэлэнд тавигдан 2007 оны зунаас худалдаалагдаж эхэлжээ. Европт 2008 оны 1 сараас худалдаанд гарсан байна.

Европын загвар нь уламжлалт хэвтээ (boxer) хэлбэртэй, 3 литрийн багтаамжтай хуваарилах нударган голоор оруулах клапангийн нээгдэх хугацаа болон зайг тохируулах (AVCS+AVLS) систем бүхий 245 м.х-тэй хөдөлгүүр, гараар шилжүүлэх боломжтой 5 шаттай автомат хурдны хайрцагтай.

Мөн Tribeca нь Subaru-н уламжлалт 50:50 гидр түгжигчтэй тэнхлэг хоорондын дифференциал, урд тэнхлэг нь туслах рамд бэхэлсэн McPherson тэнхлэг, хойд тэнхлэг нь Multilink буюу олон татуургат тэнхлэгтэй юм байна.

• Хамгийн гол сайжруулалт 2008 онд хийгдсэн бөгөөд 256 м.х-тэй 3.6 литрийн багтаамжтай  хөдөлгүүр тавьсан явдал юм.

Поршенгийн явалтыг нэмэгдүүлж, оруулах ба гаргах клапангийн нээгдэх хугацааг тохируулах DAVCS шинэ систем, жижгэрүүлсэн гидр трансформатор (гүзээ диск) бүхий шинэ төрлийн 5 шаттай хурдны хайрцаг, хойд тэнхлэгийн өөрчлөлт, VTD (Variable Torque Distribution) тэнхлэг хоорондын дифференциалтай болсон.

Ингэснээр зөвхөн тэнхлэг хооронд эргүүлэх хүчийг автоматаар 50:50 түгжих бус тухайн замын нөхцөл байдалд тохируулан VDC (Vehicle Dinamic Control) системээс авсан өгөгдөлд тулгуурлан боловсруулж хойд болон урд тэнхлэгт тохируулан хуваарилдаг болов.

Дотор салонд 160Вт-ын CD чэйнжер, МР3 уншигчтай хөгжим тавьж, жолоочийн суудал нь 8 тохиргоотой, автомат удирдлага, санамжтай болжээ. 7 инчийн хуруун мэдрэмжтэй удирдлага бүхий дэлгэц, ухрах камертай навигацийн систем, арьсан суудал зэрэг олон тоноглолуудыг захиалгаар хийлгэж болно. Мөн 2008 оноос арын багаажны суудлыг цахилгаанаар удирдлагаар эвхдэг болсон байна.