Японы авто үйлдвэрлэгч анхлан өөрсдийн дотоодын зах зээлд танилцуулсан бөгөөд түүний дараачаар гадны зах зээлд гаргаж эхэлсэн юм. Гарсан даруйдаа зах зээлд хурдан тархан хэрэглэгчдийн сонирхлыг татсан SUV болж чадсан бөгөөд бүх улиралд тохиромжтой, үр ашигтай, эдийн засагт хэмнэлттэй гэдгээрээ давуу байлаа.

Хонда CR-V болон Тоёота RAV4 загварууд нь зах зээлд хямд өртөгтэй, өдөр тутам хэрэглэхэд зардал багатай гэх зүйлсээрээ ойролцоо байсан бөгөөд ингэж явсаар байгаа түүний 2-р үе нь 2001 онд гарч эхэлсэн юм. Сивик седан дээр суурилан бүтээгдсэн түүний 2-р үе гарсан даруйдаа шинэ өрсөлдөгч нар болох Хьюндай болон Киа, Фордийн Эскэйп гэх мэтчилэн загварууд мөн мөнхийн өрсөлдөгч Тоёота Рав4 загвартай хүчтэй өрсөлдөж эхэлсэн юм.

Өмнөх үеэсээ нэг алхам урагшилж шинээр 160 морины хүчтэй 2.4 литрийн 4 цилиндртэй хөдөлгүүрийг ашиглах болсон ба улмаар илүү том тээшний зайтай, мөн ABS тормозны систем, шинэ дизайн зэрэгтэй болсон байна.

• Анхлан 2001 онд CR-V загварыг 2.0 литрийн 150 морины хүчтэй хөдөлгүүрийн хамтаар танилцуулж түүний дараагаар уг ондоо багтаан 2.4 литрийн 162 морины хүчтэй хөдөлгүүрийг танилцуулсан байна.
• 2002 онд турбо дизель 2.2 литрийн 140 морины хүчтэй хөдөлгүүрийг танилцуулсан бөгөөд EuroNCAP-ийн краш-тестээр орж 4/5, харин АНУ-ын зам тээврийн газраас 5/5 оноо авч байсан байна.
• 2005 онд явц дундын сайжруулалтыг хийсэн бөгөөд үүгээр бампер болон урд нүүрийн дизайныг өөрчилсөн мөн салонд ашигласан материалыг сайжруулсан, 5 шатлалт АТ хурдны хайрцаг танилцуулсан, тэнцвэржилтийн VSA системийг стандартаар суурилуулах болсон байна.
• 2006 онд Хонда CR-V загварын 3-р үеийг танилцуулсан байна.
  

CR-V илүү том, илүү хүчирхэг - гэхдээ V6 хөдөлгүүрийн сонголт үгүй

Гарсан цагаасаа хойш 5 жил дараалан Япон улсын хэрэглэгчдийн хамгийн их таашаадаг бага оврын SUV загвар болсон бөгөөд түүний шинэчлэлт нь цагаа олсон зөв шинэчлэлт болж чадсан юм. Ford Escape, Mazda Tribute, Hyundai Santa Fe, Jeep Liberty, Saturn VUE, Toyota RAV4 гэх мэтчилэн загваруудын хүчтэй өрсөлдөгч бөгөөд харамсалтай түүний 2002 оны бүтэн шинэчлэлтээр V6 хөдөлгүүрийн сонголтыг нэмж өгөөгүй.

Хэдий тийм ч 160 морины хүчтэй цоо шинэ 2.4 литрийн 4 цилиндртэй DOHC хөдөлгүүрийг тавьж өгсөн бөгөөд энэхүү хөдөлгүүр нь шинэ i-VTEC клапан удирдах системтэйгээр онцлог байсан. Өмнөх үеийн CR-V ашиглаж байсан 2.0 литрийн 4 цилиндртэй хөдөлгүүрээс хүчин чадал болон үр ашгийн хувьд дээшилсэн нь сайшаалтай хэрэг болж байлаа.

Хэдийгээр V6 хөдөлгүүрийн сонголт үгүй ч энэ ангилалд өрсөлдөх V6 хөдөлгүүрийн бусад загваруудаас илүү бага шатахуун зарцуулдаг байсан нь түүний давуу тал болж байсан бөгөөд цоо шинэ загвар нь хотод 100 км-т 10.6 литр, шулуунд 10.6 литр шатахуун зарцуулалттай хэмээн зарагдаж байсан. Энэ үзүүлэлт бол сайжирсан, өмнөхөөсөө том хэмжээтэй болсон, мөн хүчирхэг болсон CR-V-ийн хувьд бэст үзүүлэлт гэж хэлж болох юм.

Нэмж хэлэхэд 2002 онд гарсан 2-р үеийн CR-V нь хэрэглэгчдэд илүү олон зорчигч тээвэрлэх боломж мөн том тээшний зай зэргийг санал болгож байсан ба улмаар аюулгүйн хэд хэдэн бүрдлийг өөртөө агуулсан байв. Ерөнхийдөө өмнөх үетэй нь хэмжээг нь нарийн харьцуубал уртаараа 27 мм, өргөнөөрөө 32 мм, өндрөөрөө 7 мм илүү болсон бөгөөд кабин нь 8% томорч, хойд хэсгийн суудлын зай болоод тээшний зай 13% том болсон байдаг байна. Өмнө хэлсэн аюулгүйн иж бүрдэлд дараах зүйлс багтах бөгөөд үүнд, урд хос аюулгүйн дэр, мөн сонголтоор хажуугийн дэр, хойд голын суудлын нэмэлт толгойн түшлэг зэргийг хийлгэж болох юм байна.

Эдгээрээс гадна сүртэй өөрчлөөгүй ганц зүйл байгаа бөгөөд энэ нь Хонда компанийн 'Real-Time' 4WD систем юм. Гэхдээ энэ талаар сүүлд нь дахин тайлбарлая.

Гадаад байдал

Тэр үеийн моодонд ороод байсан өнгөний зохилдлогоо хэрэглэсэн бөгөөд хар өнгийн бампер болоод хөмсөг, хаалганы доод хүрээ зэргийг нь хар өнгийн пластик материалаар хийж анхлан гаргасан байдаг. Улмаар хойд их гэрлийг урд нарийхан өндөр хийж өгсөн нь илүү олон боломжтой мөн дизайнлаг болж өгсөн бөгөөд Хонда компанийн шилдэг загваруудын нэг болон гарч байсан юм.

Салон

2005 оны хэсэгчилсэн шинэчлэлтээр салонд зарим нэгэн зүйлсийг өөрчилсөн байна. Үүний нэг болох материалын сонголтыг өөрчилсөн хэдий ч Тоёота Рав4-ийн салоны материалд чанараараа арай хүрдэггүй дутагдалтай тал бий.

Ер нь CR-V-д юм хийх зай талбай их байхаар анхнаас нь төлөвлөсөн бөгөөд урд самбарын голд юмс хийх сав гаргаж өгснөөр ойр зуурын жижиг зүйлсээ хийгээд явахад гарт ойрхон эвтэйхэн болж өгсөн байна, улмаар урд суудлын хооронд 2 аяга тогтоогч болон жижиг ширээ шиг зүйлийг хийж өгсөн байгаа ба өвлийн нөхцөлд бээлий зэргээ тавиад явахад эвтэйхэн болжээ. Хойд дунд суудалд стандартаар ирдэг толгойн түшлэгийг аваад хаячихвал үзэгдэх орчин нэмэгдээд явчихдаг юм билээ. Мөн цонх томтой тул ер нь дажгүй шүү.

Автомат араатай хувилбарт рычак нь рулын хажууд байрласан нь гэр бүлийн вэн загвар шиг эвгүй гэхдээ шинэ урд самбарын ачаар өмнө хэлсэнчлэн юм юм хийх нүх сав хангалттай болсон юм. Нүх сав олон болохын хэрээр цэвэрлэхэд бага зэрэг хүндрэлтэй шороо ороод байдаг нь хэцүү.

Урд хянах самбар энгийн хийцтэй 2005 оны хайбрид сивик-ийх шиг гоё дуу алдмаар зүйл түүнд байхгүй нь бага зэрэг уйтгартай гэхдээ бас ч хоосон биш, цагаан хүрээ хийж өгснөөр бага зэрэг спортлог харагдуулах болсон байна лээ. Урд суудлууд бол механикаар урагшаа хойшоо чөлөөтэй хөдөлдөг, өмнөх үе шигээ тийм ч хавтгай жижигхэн биш болохоор суухад эвтэйхэн.

Хойд зорчигчийн хөл болоод толгойн зай хангалттай болсноор тухтай аялах боломж бүрдсэн гэж хэлж болно. Ачаа ачих үед суудлуудыг хурааж болох бөгөөд мөн 60/40-өөр хуваагдаж тээшний зайг нэмдэг. Нөгөө л улиг болсон хажуу тийш онгойдог арын хаалгатай тул олон нийт холхилдсон газар болоод налуу газар нээж хаахад төвөгтэй. Запас дугуй нь тээшний хэсгийн доор хийж өгснөөр зүүдэг дугуйнаас үзэгдэх орчин арай илүү болсон давуу талтай.

Жолоодлого

CR-V-ийн шинэ 2.4 литрийн i-VTEC хөдөлгүүр нь 160 морины хүчийг хөдөлгүүрийн 6000 эрг/минутанд, 220 Нм эргүүлэх хүчийг 3600 эрг/минутад гаргах цахдвартай. Өмнөх үеийн 4 цилиндртэй хөдөлгүүрээс ухаалаг клапан удирдах систем болох i-VTEC-ийг хэрэглэснээр 10% илүү морины хүч болоод 22% илүү эргүүлэх хүч гаргах чадвартай болсон байна. ийм төрлийн автомат клапангийн систем хэрэглэснээр тухайн хөдөлгүүрийн эргэлт бүрт тохирсон клапангийн нээгдэх хугацаа болон зайг тохируулдаг болсон бөгөөд илүү их хүч болоод хорт утаан ялгаруулалтыг багасгах давуу талыг бий болгосон байна.

4 цилиндртэй бага оврын SUV-ийн хувьд хурдатгал авахдаа тун ч сайн гэсэн үнэлгээг биднээс авч чадсан юм. CR-V-ийн автомат хурдны хайрцагтай хувилбар нь 0-100 км/ц хурдыг ойролцоогоор 10 секундэд авч байсан бөгөөд V6 хөдөлгүүртэй Suzuki Vitara гэх мэтчилэн загваруудтай ижил шахуу үзүүлэлт юм.

Шулуун замд явах үед хөдөлгүүрээс сонсогдох дуу маш чимээгүй байсан ба 100 км/ц хурдтай 4-р араанд орцон явж байхад хөдөлгүүр 2,300 эрг/минут, 120 км/ц хурдтай явж байхад хөдөлгүүрийн эргэлт 2,800 эрг/мин байлаа. 2-р үеийн CR-V-ийн хөдөлгүүрийн улаан шугам 6,500 эрг/минутаар хязгаарлагддаг бөгөөд ерөнхийдөө энэ хөдөлгүүр бол чимээгүй гэсэн үнэлгээг надаас авлаа.

Өмнөх үеийн CR-V-ээс шинэ 2-р үеийн CR-V-ийн хөдөлгүүр илүү чимээгүй болсон нь давуу тал мөнөөс мөн, нормал үед хөдөлгүүрээс ирэх чичиргээ байхгүй, шулуун замд бага зэргийн чичиргээтэй хэдий ч кабинд хөдөлгүүрийн дуу маш бага сонсогдож зөвхөн салхины чимээ л заримдаа сонсогдож байлаа.

4 шатлалт автомат хурдны хайрцгийн араа шилжилт зөөлхөн элдэв доголгүй ажиллаж харин хаазыг огцом өгөх үед угзарсан араа солигдолт мэдрэгдэж байв. 90-ээд оны эхээр Хонда компанийн автомат хурдны хайрцаг ангилалдаа бэстэд тооцогдож байсан тэр л уламжлалаа хадгалсан нь сайн хэрэг юм.

2002 оны CR-V нь шинэ Сивик платформыг ашиглан бүтээгдсэн бөгөөд урд тэнхлэг нь мак-фэрсон страц бүтэцтэй, харин хойд тэнхлэг нь дээд доод гараас бүтсэн тэнхлэгтэй болсон байна. Шинэ урд тэнхлэгийн болоод хойд тэнхлэгийн ачаар тээшний зай болоод салоны зай томссон мөн сайжруулсан рулын аппарат суурилуулах боломжтой болсон юм.

Анх жолоодож үзэхэд шинэ CR-V нь надад илүү тав тухтай санагдсан бөгөөд өмнөх үеэсээ илүү тогтвортой нь мэдэгдэж байсан юм. Хэдийгээр айхтар ч SUV-ын чадварт хүрэхгүй ч гэлээ "машин шиг машин" болсон нь надад таалагдаж байв. Огцом эргэлт, хурд авалт, тормозлолт зэрэг нь хэдий өндөр биетэй ч маш тогтвортой байгаа нь сайшаалтай.

4 дугуй хөтлөгчтэй хувилбарт 'Real-Time' 4 дугуйн хөтлөгч системийг санал болгодог бөгөөд энэхүү систем нь ихэнх энгийн үед хүчийг урд тэнхлэгт дамжуулж шатахуун хэмнэлтийг нэмэгдүүлдэг давуу талтай байна. Энэхүү системийн гол зангилаа болсон Dual Pump System (DPS) нь хойд дифферециалд багтах бөгөөд 2 ширхэг гидравлик шахуургын туслалцаатай ажиллах нөхцөл нь бүрддэг байна.

Нэг нь хурдны хайрцгаас хагас голтой холбогдож нөгөөх нь хойд дифференциал дотор ажиллаж байдаг. Хэвийн нөхцөлтэй үед хүчийг урд тэнхлэгт дамжуулж байдаг бөгөөд харин урд тэнхлэгийн дугуйнууд замтай барьцалдах чадваргүй хий эргэх үед 2 шахуургын хооронд даралтын ялгаа үүсч улмаар хавхлагыг нээж хос авцуулах холбоог идэвхжүүлдэг байна.

Энэхүү авцуулах холбоо нь урд хагас гол болоод хойд дифференциал 2-ийн хооронд байрлаж байдаг бөгөөд идэвхжсэн авцуулах холбоо залгагдсанаар хүчийг хойд тэнхлэгт дамжуулснаар туулах чадварыг нэмэгдүүлдэг байна. Урд дугуй улам хий эргэх тусам хүчийг хойд тэнхлэгт илүү ихээр дамжуулдаг нь Тоёота Рав4 болоод Субару Форестерийн AWD системээс давуу болж чадсан юм. Хэрвээ таны хойд тэнхлэгт сонин дуу гарч байх юм бол даруй DPS-ийн тосыг нь солиулаарай. Зөвхөн Хондагийн DPSF хэмээх тос ордог бөгөөд солиход 1.2 литр шаардагддаг. Ер нь бол анхнаас 115.000 км-д энэхүү тосыг сольж улмаар 70.000 км тутамд дахин солих шаардлагыг тавьдаг юм билээ.

2.4 литрийн хөдөлгүүрт NGK ZFR6K-11 болон Денсогийн KJ20DR-M11 свечи таардаг бөгөөд 15.000 км тутамд солих заавартай байдаг юм билээ. Улмаар урд хэвтээ тэнцүүлэгчийн втулк, хойд хэвтээ тэнцүүлэгчийн втулк, гарны втулк зэргийг нь байнга шалгаж байгаарай.